İtkin alpinistlər axtarılır
“Gilavar” hava və ekstrim idman klubunun 3 üzvü axtarılır. Fövqəladə Hallar Nazirliyinin bildirdiyinə görə, alpinistlər dekabrın 23-də Quba rayonunun Xınalıq kəndindən Tufandağ istiqamətində yürüşə çıxıblar.
Dekabrın 26-sı axşam nazirliyin Böhran Vəziyyətlərində İdarəetmə Mərkəzinə alpinistlərin geri qayıtmadığı və onlarla əlaqənin kəsildiyi barədə məlumat daxil olub.
Məlumat aidiyyəti qurumlara ötürülüb. Fövqəladə Hallar Nazirliyinin aviasiya dəstəsi axtarışlara başlayıb. Axtarışa helikopterlər cəlb olunub.
APA-nın xəbərinə görə, axtarılan alpinistlər Hüseynov Babur Vaqif oğlu, Bünyatzadə Namin Nizami oğlu və Cəbrayılzadə Fəridə Cəbiyulla qızıdır.
“Report” Babur Hüseynovun Daxili İşlər Nazirliyinin əməkdaşı, polis leytenantı olduğunu bildirir.
