Güzəştli kredit: ilə 146 milyon manatla yekun vurdu
İqtisadiyyat Nazirliyinin Sahibkarlığa Kömək Milli Fondu ilin sonuncu işgüzar forumunu dekabrın 27-də Suraxanı rayonunun Əmircan qəsəbəsində keçirib. 100-dən çox sahibkarın qatıldığı forumda çıxış edən Sahibkarlığa Kömək Milli Fondunun icraçı direktoru Şirzad Abdullayev 2017-ci ildə güzəştli kreditlər hesabına həyata keçirilən layihələr barədə məlumat verib.
Rəsmi məlumata görə, icraçı direktor o deyib ki, bu il 1953 sahibkarlıq subyektinin ümumi dəyəri 635,6 milyon manat olan investisiya layihəsinin maliyyələşdirilməsinə 146 milyon manat güzəştli kredit verilib: “Bu layihələrin reallaşdırılması 6600-dək yeni iş yerinin açılmasına imkan yaradır. Verilən kreditlərin 65%-i regionların, 35%-i Bakı şəhərinin qəsəbələrinin payına düşür. Güzəştli kreditlərin 67,6%-i aqrar sektorun, 32,4% müxtəlif sənaye məhsullarının istehsalı və emalı sahələrinin inkişafına və başqa sahələrə. yönəldilib”.
Hesabata əsasən, 2017-ci ildə dövlətin güzəştli kreditləri hesabına maliyyələşdirilən 60 müəssisə istifadəyə verilib, 40 müəssisə üzrə isə tikinti-quraşdırma işləri davam etdirilir.
Şirzad Abdullayev bildirib ki, 2018-ci ildə aqroparkların, cins iri buynuzlu heyvandarlıq və istixana komplekslərinin, iri fermer və intensiv bağçılıq təsərrüfatlarının, logistik mərkəzlərin, ət kəsimi və emalı, yem, çörək, tikinti materiallarının istehsalı, meyvə-tərəvəz məhsullarının emalı və digər sənaye müəssisələrinin yaradılması, eləcə də kiçik sahibkarlığın inkişafı dövlətin güzəştli kreditlərinin yönəldiləcəyi əsas istiqamətlər olacaq.
İşgüzar forum çərçivəsində sahibkarlıq subyektləri 8,8 milyon manat güzəştli kredit alıb.
