Rəhim Qazıyevə həbs cəzası verilib
Keçmiş müdafiə naziri Rəhim Qazıyevə inzibati həbs cəzası verilib. O, 10 sutkalığa həbs olunub.
Məlumatı jurnalist Əvəz Zeynallı sosial şəbəkədə yayıb.
Həbs qərarı dekabrın 26-da Nərimanov Rayon Məhkəməsində çıxarılıb.
Məhkəmə qərarından sonra Rəhim Qazıyevin paytaxt polisinin inzibati həbs məntəqəsinə aparıldığı bildirilir.
Rəhim Qazıyevin hansı əsasla həbs edildiyi hələ bəlli deyil. Onu dekabrın 25-də Nərimanov Rayon Polis İdarəsinin əməkdaşları saxlamışdı.
1943-cü ildə Şəkidə doğulan Rəhim Qazıyev Azərbaycan Xalq Cəbhəsinin yaradıcılarından olub. 1990-cı ilin 20 Yanvar qırğınından sonra bir müddət həbsdə yatıb. Azadlığa çıxandan sonra parlamentin deputatı seçilib.
1992-ci ilin martından 1993-cü ilin fevralınadək müdafiə naziri postunu tutub. 1993-cü ildə həbs olunub. 1994-cü ildə həbsdən qaçırılıb. 1996-cı ildə yenidən həbs edilib. Ömürlük həbsə məhkum edilən Rəhim Qazıyev 2005-ci ildə əfv olunub.
