Məhkəmə hesab edir ki, AXCP sədrinin müşaviri islah olunmayıb
Dekabrın 26-da Suraxanı Rayon Məhkəməsində AXCP sədrinin həbsdə olan müşaviri Məmməd İbrahimin cəzasının yarıdan çoxunu çəkməsiylə əlaqədar vaxtından əvvəl azadlığa buraxılması haqda müraciətinə baxılıb.
Məhkəmə prosesi Məmməd İbrahimin saxlandığı 16 saylı Cəzaçəkmə Müəssisəsində keçirilib.
Hakim Elçin Ağayev müraciəti təmin etməyib.
Yaxınlarının “Azadlıq” radiosuna dediyinə görə, hakim bu qərarı çıxararkən Məmməd İbrahimin islah olunmadığını, həbsxanada nizam-intizam qaydalarına əməl etmədiyini əsas gətirib.
Məmməd İbrahim AXCP-dən ayrılmış Mikayıl Quliyevin şikayəti əsasında 2015-ci il sentyabrın 30-da həbs edilib. O, Mikayıl Quliyevi vurmaqda ittiham olunub, ona Cinayət Məcəlləsinin 221.1-ci (xuliqanlıq) maddəsi ilə ittiham irəli sürülüb. Bir müddət sonra daha iki nəfər — Oruc Vəliyev və Məhəmməd Qurbanov da şikayət verərək bildiriblər ki, insident zamanı Məmməd İbrahim onları da vurub. Bundan sonra ittiham maddəsi ağırlaşdırılıb və Cinayət Məcəlləsinin 221.2.2-ci maddəsinə tövsif olunub.
2016-cı il martın 15-də Nərimanov Rayon Məhkəməsinin hökmü ilə Məmməd İbrahim 3 il azadlıqdan məhrum edilib. 2016-cı il mayın 13-də Bakı Apellyasiya Məhkəməsi, sentyabrın 28-də Ali Məhkəmə hökmü qüvvədə saxlayıb.
Məmməd İbrahim ittihamı qəbul etmir və həbsinin siyasi sifariş olduğunu bildirir.
