İşsizlikdən sığorta sistemi barədə arayış
Əmək və Əhalinin Sosial Müdafiəsi Nazirliyi işsizlikdən sığorta sisteminin tətbiqi barədə arayış yayıb. İşəgötürənlərə müraciətdə qeyd olunur ki, 2018-ci il yanvarın 1-dən “İşsizlikdən sığorta haqqında” qanun qüvvəyə minir. Həmin qanunla işçilərini işsizlikdən sığorta etdirmək, əməkhaqqı fondundan və sığortaolunanın əməkhaqqından sığorta haqqını sığortaçıya ödəmək sığortaedənin vəzifələrinə aid edilib.
Arayışda bildirilir:
– Məcburi dövlət sosial sığortası məqsədləri üçün Dövlət Sosial Müdafiə Fondunda uçota alınmış sığortaedənlər işsizlikdən sığorta məqsədləri üçün fondda qeydiyyata alınmış hesab edilirlər.
– Sığortaedənin məcburi dövlət sosial sığortası məqsədləri üçün verilmiş uçot nömrəsi (SUN) eyni zamanda onun işsizlikdən sığorta məqsədləri üçün fondda qeydiyyat nömrəsi hesab edilir.
– Məcburi dövlət sosial sığortası üzrə dövlət sosial sığorta sistemində fərdi uçotu aparılan sığortaolunanlar (yalnız əmək müqaviləsi ilə işləyənlər) işsizlikdən sığorta üzrə fondda qeydiyyata alınmış hesab olunurlar.
– Sığortaedənlərin hesablayıb fonda ödədiyi işsizlikdən sığorta haqları barədə məlumatlar sığortaolunanların fərdi şəxsi hesablarında nəzərə alınmır.
– İşsizlikdən sığorta haqqını hesablanmış əməyin ödənişi fondunun 0,5 faizi və işçinin əməkhaqqının 0,5 faizi miqdarında sığortaedən ödəyir.
– İşsizlikdən sığorta haqqının hesablanmasından azad olma müəyyən edilməyib.
– Hər ay üçün hesablanmış işsizlikdən sığorta haqqı əməkhaqqı ödənişləri ilə eyni vaxtda, lakin sonrakı ayın 15-dən gec olmayaraq tam məbləğdə fonda ödənir.
– Sığortaedənlər hər rüb üçün “İşsizlikdən sığorta üzrə rüblük hesabat”ı həmin rübdən sonra gələn birinci ayın 20-dən gec olmayaraq və hər rüb üçün ayrı-ayrılıqda fonda məcburi dövlət sosial sığortası üzrə rüblük hesabatla birgə təqdim edirlər.
Aprelin, iyulun, oktyabrın və yanvarın 20-si iş günü olmayan dövrə təsadüf edərsə, hesabatın təqdim olunması müddəti ayın 20-dən sonra gələn birinci iş gününə qədər artırılır.
– İşçilərin işsizlikdən sığorta etdirilməməsinə, sığorta haqqının hesablanmasının və köçürülməsinin uçotunun düzgün aparılmamasına və bu barədə sığortaçıya hesabatın təqdim edilməməsinə, sığorta haqqının vaxtında köçürülməməsinə görə inzibati qaydada məsuliyyət tədbirləri nəzərdə tutulub.
