2018-ci ilin dövlət büdcəsi
Prezident İlham Əliyev 2018-ci il dövlət büdcəsi qanununu imzalayıb. Qanun parlamentdə dekabrın 1-də qəbul olunmuşdu. Həmin gün deputatlar büdcə zərfinə daxil olan başqa qanun layihələrinə də səs veriblər.
Novator.az-ın məlumatına görə, dövlət büdcəsinin gəlirləri 20 milyard 127 milyon manat, xərcləri 21 milyard 47 milyon manat məbləğində təsdiq edilib.
Dövlət Sosial Müdafiə Fondunun büdcəsi 3 milyard 578 milyon 760 min manatdır.
2018-ci il üçün yaşayış minimumu ölkə üzrə 173 manat, əmək qabiliyyətli əhali üçün 183 manat, pensiyaçılar üçün 144 manat, uşaqlar üçün 154 manat məbləğində müəyyən edilir.
Ünvanlı dövlət sosial yardımının təyin edilməsi məqsədilə 2018-ci il üçün ehtiyac meyarının həddi 130 manat məbləğində təsdiqlənir.
İşsizlikdən sığorta fondunun 2018-ci il büdcəsi 89 milyon manatdır.
Milli Məclis üçün 25,4 milyon manat, Hesablama Palatası üçün 3,8 milyon manat vəsait nəzərdə tutulur.
Dövlət başçısının dekabrın 25-də imzaladığı sərəncamla minimum aylıq əməkhaqqının məbləği 2018-ci il yanvarın 1-dən 130 manat müəyyən edilir. Hazırda minimum əməkhaqqı 116 manatdır.
