Paraqvay parlamenti Xocalı soyqırımını tanıdı
Paraqvay Milli Konqresinin Deputatlar Palatası Azərbaycanın Dağlıq Qarabağ bölgəsinin Xocalı şəhərində törədilmiş soyqırımının pisləyən bəyanat qəbul edib. APA-nın 21 dekabr məlumatına görə, sənəddə bir sıra dövlətlərin Ermənistan Silahlı Qüvvələrinin Azərbaycanın mülki əhalisinə qarşı törətdiyi soyqırımını və insanlıq əleyhinə cinayətini pislədiyi vurğulanır, Azərbaycan ərazilərinin silahlı işğalı qınanır, Azərbaycanın ərazi bütövlüyünə, suverenliyinə və beynəlxalq səviyyədə tanınmış sərhədlərinin toxunulmazlığına hörmət ifadə edilir.
Bəyanatda BMT Təhlükəsizlik Şurasında 1993-cü ildə qəbul olunmuş 822, 853, 874 və 884 nömrəli qətnamələrin təcavüzün dayandırılmasını, Ermənistanın Azərbaycan ərazilərini işğalı nəticəsində yaranmış münaqişənin həlli yolu kimi dialoqun təşviq edildiyi bildirilir.
Deputatlar Palatası 1992-ci ildə Xocalı şəhərində törədilən soyqırımı pislədiyini və insanlıq əleyhinə bu cinayətin 26-cı ildönümünün anılması münasibətilə Azərbaycan xalqı ilə həmrəyliyini ifadə etdiyini bəyan edib.
1992-ci il fevralın 25-dən 26-na keçən gecə erməni silahlı birləşmələri keçmiş sovet ordusunun Xankəndidəki 366-cı alayı ilə birgə Azərbaycanın Xocalı şəhərini işğal edib. İşğal zamanı 613 nəfərin həyatına son qoyulub. 8 ailə bütövlüklə məhv edilib, 25 uşaq hər iki valideynini, 130 uşaq isə valideynlərinin birini itirib.
Novator.az bildirir ki, Meksika, Kolumbiya, Peru, Pakistan, Bosniya və Herseqovina, Rumıniya, Çexiya, Sloveniya, İordaniya, Honduras, Qvatemala, Panama, Sudan, Cibuti, Şotlandiya parlamentləri, ABŞ-ın bir çox ştatının qanunverici orqanları Xocalı soyqırımını tanıyan və qınayan sənədlər qəbul ediblər. İslam Əməkdaşlıq Təşkilatı Ermənistanı təcavüzkar, Xocalı faciəsini soyqırımı kimi tanıyıb.
1988-ci ildə başlayan Qarabağ müharibəsində Ermənistan Azərbaycanın bütün cənub-qərb bölgəsini (Dağlıq Qarabağı və ətraf 7 rayonu), eləcə də Qazax rayonunun 7, Naxçıvan Muxtar Respublikasının 1 kəndini işğal edib. 1994-cü ildə elan olunan atəşkəsdən bəri sülh danışıqları heç bir nəticə vermir.
