Yola cavabdeh olan agentlik rəsmiləşdi
Azərbaycan Avtomobil Yolları Dövlət Agentliyinin nizamnaməsi prezident fərmanı ilə rəsmiləşib, həmçinin qurumun strukturu təsdiq edilib. Novator.az-ın məlumatına görə, prezident İlham Əliyevin dekabrın 19-da verdiyi fərmanla Nazirlər Kabinetinə “Azəravtoyol” Açıq Səhmdar Cəmiyyətinin balansında olan əmlakın agentliyin balansına verilməsini həll etmək (dövlət qeydiyyatına alındığı gündən sonra) tapşırılıb.
Azərbaycan Avtomobil Yolları Dövlət Agentliyi mərkəzi aparatdan, təsərrüfat cəmiyyətlərindən, tabeliyindəki hüquqi şəxs statusuna malik olmayan təşkilatlardan (idarələrdən), filial və nümayəndəliklərdən ibarətdir.
Nizamnaməsinə görə, Azərbaycan Avtomobil Yolları Dövlət Agentliyi Azərbaycan Respublikasının avtomobil yolu təsərrüfatı sahəsində xidmət göstərilməsi, balansında olan avtomobil yollarının, habelə körpülərin, tunellərin və digər yol qurğularının layihələndirilməsi, tikilməsi, istismarı, bərpası, təmiri, yenidən qurulması, avtomobil yollarının və yol qurğularının qorunub saxlanılması və onların vəziyyətinə nəzarət edilməsi, habelə yol infrastrukturunun inkişafı ilə bağlı digər işlərin kompleks şəkildə aparılmasının təmin edilməsi sahəsində fəaliyyətlə məşğul olan publik hüquqi şəxsdir.
Agentliyin idarəetmə orqanı onun İdarə Heyətidir. İdarə Heyətinin tərkibi prezidentin vəzifəyə təyin və vəzifədən azad etdiyi sədrdən və iki sədr müavinindən ibarətdir.
Qurumun nizamnamə fondu 644 milyon 987 min 156 manatdır.
