Əvəz Zeynallı cərimələndi
Jurnalist, Siyasi Məhbusları Müdafiə Mərkəzinin üzvü Əvəz Zeynallı 200 manat cərimə edilib.
Novator.az-ın məlumatına görə, qərar dekabrın 20-də Binəqədi Rayon Məhkəməsində İnzibati Xətalar Məcəlləsinin 535.1-ci (polisin qanuni tələbinə tabe olmama) maddəsinə əsasən çıxarılıb.
Azadliq.info bildirir ki, proses qapalı keçirilib. Vəkil Elçin Sadıqov, Əvəz Zeynallının qohumları, ailə üzvləri, o cümlədən xanımı məhkəmə zalına buraxılmayıb.
Əvəz Zeynallını dekabrın 19-da Binəqədi Rayon Polis İdarəsinin əməkdaşları saxlamışdı. Cərimə qərarı çıxarılandan sonra o, məhkəmə zalından sərbəst buraxılıb.
Jurnalistin xanımı Məlahət Zeynallı dekabrın 19-da yaydığı məlumatda bildirmişdi ki, Əvəz Zeynallı uzun müddətdir Binəqədi polisinin yollarda yaratdığı məhdudiyyətlərlə bağlı sosial şəbəkədə tənqidi videolar yayır. Məlahət Zeynallının bildirdiyinə görə, Əvəz Zeynallı dekabrın 19-da yolda növbəti çəkilişi aparmaq istəyəndə polislərlə onun arasında mübahisə yaranıb və həmin mübahisə jurnalistin saxlanmasına səbəb olub.
Əvəz Zeynallı 1969-cu ildə doğulub. Ankara Dövlət Universitetini bitirib. “Günaydın”, “P.S.”, “Millətin səsi” qəzetlərinin yazarı, “Vətəndaş həmrəyliyi” qəzetinin baş redaktoru olub. 2002-ci ildə “Xural” qəzetini yaradıb. 2011-ci il sentyabrın 20-dək həftədə bir dəfə çıxan “Xural” qəzeti həmin gündən həftədə yeddi dəfəyə keçib. 2011-ci il oktyabrın 19-da “Xural”ın əmlakı məhkəmə iddiaları üzrə çıxarılmış qərarlara görə müsadirə olunub. Ertəsi gün qəzetin nəşri dayanıb. Oktyabrın 28-də isə Əvəz Zeynallı həbs edilib. Külli miqdarda rüşvət alma və vergi ödəməkdən yayınmada təqsirli bilinərək Bakı Ağır Cinayətlər Məhkəməsinin hökmü ilə 9 il müddətinə azadlıqdan məhrum edilən Əvəz Zeynallı 2014-cü il dekabrın 30-da prezident İlham Əliyevin imzaladığı əfv sərəncamı ilə azadlığa çıxıb.
