Namiq Sadıqlının şikayəti təmin olunmayıb
Dekabrın 19-da Bakı Apellyasiya Məhkəməsində AXCP fəalı, bloqçu Namiq Sadıqlının həbsindən verilmiş şikayətə baxılıb. Azadliq.info xəbər verir ki, şikayət təmin olunmayıb, inzibati həbs qərarı qüvvədə saxlanıb.
Namiq Sadıqlını (Namiq Sadiqov) noyabrın 30-da polis saxlayıb. Dekabrın 1-də Nəsimi Rayon Məhkəməsi onu polisin qanuni tələbinə tabe olmamaqda təqsirli bilərək 30 sutka inzibati həbsə məhkum edib.
Müdafiəçiləri Namiq Sadıqlının həbsini sosial şəbəkələrdə yaydığı tənqidi xarakterli videolarla əlaqələndirirlər.
Namiq Sadıqlı Binəqədidəki inzibati həbs yerində saxlanır.
Dekabrın 12-də vəkil Əsabəli Mustafayev bloqçunun səhhətində ciddi problemlərin olduğunu bildirmişdi. Vəkil qeyd etmişdi ki, həmin müddətədək Namiq Sadıqlı üçün 4 dəfə təcili tibbi yardım çağrılıb, o, xəstəxanaya aparılaraq müayinə olunub.
Apellyasiya prosesindən sonra Əsabəli Mustafayev bloqçunun səhətindəki problemlərin aradan qalxmadığını, onun saxlandığı yerdə müalicə kursunu davam etdirdiyini söyləyib.
Namiq Sadıqlının səhhəti ilə bağlı ombudsmana müraciət edilib.
