Jirinovski SSRİ-dən qopanlara muxtariyyət vəd edir
Dövlət Dumasının sədr müavini, Liberal Demokrat Partiyasının lideri Vladimir Jirinovski keçmiş SSRİ məkanındakı müstəqil ölkələrin könüllü şəkildə Rusiyanın tərkibinə qatılmasına çağırış edib.
1922-ci ildə yaradılmış SSRİ-yə dağıldığı 1991-ci ilə qədər 15 respublika daxil olub: Estoniya, Latviya, Litva, Moldova, Belarus, Ukrayna, Rusiya, Azərbaycan, Ermənistan, Gürcüstan, Qazaxıstan, Qırğızıstan, Tacikistan, Özbəkistan, Türkmənistan.
Novator.az-ın məlumatına görə, Liberal Demokrat Partiyasının 20 dekabr qurultayındakı çıxışında Jirinovski deyib ki, Rusiya vahid və bölünməzdir: “Biz keçmiş SSRİ-nin hansısa ərazisinin könüllü şəkildə geri qayıdıb Moskva ilə qarşılıqlı əlaqə formasını seçəcəyini gözləyəcəyik”.
Jirinovskinin fikrincə, Rusiya ilə birləşən regionlara geniş muxtariyyət verilməsi mümkündür: “Onlara xarici siyasət, müdafiə, maliyyə məsələlərindən başqa bütün məsələlərdə sərbəstlik, geniş muxtariyyət vermək olar”.
Liberal Demokrat Partiyasının 20 dekabr qurultayının qərarı ilə Jirinovski 2018-ci il martın 18-də keçiriləcək prezident seçkisində namizəd olacaq.
