Ermənistan və daha 25 ölkə Ukraynaya qarşı çıxdı
BMT Baş Məclisi Ukraynanın Krım bölgəsi ilə bağlı qətnamə qəbul edib.
2014-cü ilin fevralından Ukrayna torpaqlarının bir hissəsi Rusiyanın işğalı altındadır. Krım Muxtar Respublikası və Sevastopol şəhəri Rusiyaya birləşdirilib, Donbas bölgəsində isə Moskvadan dəstək alan iki separatçı rejim qurulub.
Dekabrın 19-da BMT Baş Məclisinin rəsmiləşdirdiyi Krım qətnaməsi insan hüquqları sahəsində vəziyyəti əhatə edir. Novator.az-ın məlumatına görə, BMT bölgəni işğal edən Rusiyanı Krımda insan hüquqlarının pozulmasına son qoymağa çağırır. Baş Məclis Krımda Rusiya qanunlarının və idarəçiliyinin tətbiqini pisləyir, bu ölkəni Krımın işğalına qədər qüvvədə olmuş qanunlara, beynəlxalq hüquqla götürülmüş öhdəliklərə hörmətə səsləyir.
BMT-nin qətnaməsində Krım-Tatar Məclisinin ekstremist təşkilat sayılaraq qadağan olunması qərarının ləğvinə, qanunsuz tutulmuş Ukrayna vətəndaşlarının dərhal azadlığa buraxılmasına çağırış yer alır. Baş Məclis Rusiyadan beynəlxalq insan haqları təşkilatlarının Krıma maneəsiz girişinə təminat verməyi tələb edir.
Ukraynanın təqdim etdiyi qətnaməyə 70 ölkənin təmsilçisi səs verib, 76 nümayəndə bitərəf qalıb.
26 nümayəndə isə sənədin əleyhinə çıxıb. Novator.az qeyd edir ki, onlardan biri Ermənistandır.
Keçmiş SSRİ məkanından Rusiya, Belarus, Qazaxıstan, Qırğızıstan, Tacikistan, Özbəkistan da qətnamənin əleyhinə olub.
Krım qətnaməsinə qarşı çıxan digər ölkələr bunlardır: Çin, Hindistan, İran, Serbiya, Boliviya, Kuba, Şimali Koreya, Burundi, Kamboca, Eritreya, Myanma, Nikaraqua, Filippin, Cənubi Afrika Respublikası, Sudan, Suriya, Uqanda, Venesuela, Zimbabve.
