“Azərenerji” yoxlandı
Hesablama Palatası “Azərenerji” Açıq Səhmdar Cəmiyyətində auditin nəticələri barədə məlumat yayıb. Novator.az bildirir ki, rəsmi açıqlamaya görə, “Azərenerji”nin maliyyə-təsərrüfat fəaliyyətinin auditi zamanı gəlirlər və xərclər smetalarının aidiyyəti dövlət qurumları ilə razılaşdırılması, rentabelliyə mənfi təsir etməklə zərəri artıran amillərin qismən aradan qaldırılması imkanlarından istifadə olunması, aktivlərin, debitor və kreditor borcların uçotunun və hesabatlılığının təşkili, daxili audit sisteminin formalaşdırılması sahəsində nöqsanlar aşkar olunub.
Elektrik enerjisinin satışı üzrə debitor borcların artması, müxtəlif mənbələr hesabına həyata keçirilən kapital qoyuluşlarından səmərəli istifadə olunmaması halları da müşahidə edilib.
Hesabata görə, kapital və aktivlərin artırılması ilə bağlı potensialın tam reallaşdırılmadığı, qısamüddətli aktivlərin öhdəlikləri yerinə yetirmək vəziyyətini əks etdirən göstəricinin aşağı olduğu, cəmiyyətin öhdəliklərinin xalis kapitalından çox olması səbəbindən maliyyə risklərinin yüksək olduğu, həmçinin hər səhmə düşən dividend məbləğinin azaldığı müəyyən edilib.
Hesablama Palatası “Şirvan İES” MMC və “Bakı İEM” MMC-də istehsal olunan enerjinin iqtisadi göstəricilərinin aşağı olduğunu da bildirir.
