Universitetlərdə 3 minə yaxın iş yeri təqdim olunub
Bu il 10 universitetdə keçirilmiş aktiv məşğulluq tədbirlərində 570 müəssisə üzrə 2,9 mindən çox vakant iş yeri təqdim edilib. Əmək və Əhalinin Sosial Müdafiəsi Nazirliyinin məlumatına görə, Azərbaycan Dövlət Neft və Sənaye Universitetində, “Karyerada ilk addım” tədbirində belə deyilib.
16 dekabr tədbirində qeyd olunub ki, Əmək və Əhalinin Sosial Müdafiəsi Nazirliyinin bu ilin 11 ayında məşğulluğunu təmin etdiyi şəxslərin 33 faizi, haqqı ödənilən ictimai işlərə cəlb etdiyi şəxslərin 30 faizi gənclərdir. Nazirliyin xətti ilə təşkil olunan peşə hazırlığı və əlavə təhsil kurslarına cəlb edilənlərin 57,3 faizinin gənclər olduğu bildirilir.
Hesabata görə, bu ilin 11 ayında məşğulluq orqanları 91,4 min nəfər gəncə əmək bazarında peşə və ixtisaslara olan tələbat barədə məlumatlar və peşəyönümü məsləhətləri verib. “Karyerada ilk addım” tədbirləri də tələbə və məzunların əmək bazarına çıxışının dəstəklənməsinə, onların işəgötürənlərlə ilkin əlaqələrinin qurulmasına xidmət edir. Cari ildə 10 universitetdə keçirilən belə tədbirlərdə 570 müəssisə üzrə 2,9 mindən çox vakant iş yeri təqdim olunub.
Əmək və Əhalinin Sosial Müdafiəsi Nazirliyi bildirir ki, Azərbaycan Dövlət Neft və Sənaye Universitetindəki “Karyerada ilk addım” tədbirinə 307 boş (vakant) iş yeri çıxarılıb. Tədbirdə tələbə və məzunlar işəgötürənlərlə ilkin ünsiyyət quraraq şəxsi məlumatlarını təqdim ediblər. İşəgötürənlərə isə müvafiq ixtisaslar üçün kadrların seçimini aparmaq imkanı yaradılıb. Həmçinin boş (vakant) iş yerlərinə göndərişlər verilib, ixtisasartırma kurslarına cəlb edilmək istəyənlərin qeydiyyatı aparılıb.
