11-ci milli televiziya üçün 3 sənəd verilib
Milli Televiziya və Radio Şurası ölkə üzrə yayımlanan xəbər televiziya kanalının açılması üçün elan etdiyi müsabiqəni başa çatdırıb. Müsabiqə noyabrın 16-dan dekabrın 16-dək aparılıb. Rəsmi məlumata görə, Bakı və Abşeron ərazisində 31-ci tezlik resursunu əldə etmək üçün 3 iddiaçı sənəd verib – “BAKU ART LAB” MMC, “Türkel TV” MMC, “MEDİA MASTER” MMC. Yayım hüququnun hansı quruma verilməsi 2018-ci il yanvarın ortalarına kimi açıqlanmalıdır.
Novator.az bildirir ki, hazırda bütün ölkədə yayılan 10 televiziya var: AzTV, “Mədəniyyət”, “İdman Azərbaycan”, İctimai Televiziya, ATV, “Space”, “Xəzər”, “Lider”, ARB, “CBC Sport”.
Milli Televiziya və Radio Şurası 2002-ci ildə televiziya və radio yayımı sahəsində dövlət siyasətinin həyata keçirilməsini təmin etmək və bu fəaliyyəti tənzimləmək məqsədilə yaradılıb.
Şura dövlət büdcəsindən maliyyələşdirilir. Onun 9 üzvü var. Üzvləri prezident təyin edir.
Qurumun sədri postunu Nuşirəvan Məhərrəmli tutur.
