Yeni təhsil proqramı
Prezident İlham Əliyev sağlamlıq imkanları məhdud şəxslər üçün inklüziv təhsilin inkişafı proqramını təsdiqləyib. 2018-2024-cü illəri əhatə edən proqramın icrasını əlaqələndirmək dekabrın 14-də imzalanan sərəncamla Təhsil Nazirliyinə həvalə olunub.
Novator.az-ın məlumatına görə, sənəddə qeyd olunur ki, inklüziv təhsil uşaqların fiziki, psixi, intellektual və digər xüsusiyyətlərindən asılı olmayaraq öz həmyaşıdları ilə məktəbdə eyni sinifdə təhsilə cəlb edilməsidir: “Azərbaycanda inklüziv təhsilin tətbiqinə 2004-cü ildən başlayaraq təşəbbüslər olub. 2005-2009-cu illərdə 15 ümumi təhsil müəssisəsində, 13 məktəbəqədər təhsil müəssisəsində 268 nəfər əlilliyi olan uşaq inklüziv təhsilə cəlb olunub.
2015-2016-cı tədris ilindən “İbtidai təhsil səviyyəsi üzrə inklüziv təhsilin tətbiqi” layihəsinin icrasına başlanıb. İnklüziv təhsil sahəsində yeni yanaşmaların tətbiqi ilə bağlı tədbirlər dörd eksperimental məktəbdə uğurla sınaqdan keçirilir”.
14 dekabr proqramının əsas vəzifələri belə müəyyən olunub: sağlamlıq imkanları məhdud şəxslərin təhsilin bütün pillələri üzrə inklüziv təhsil hüququnu təmin etmək məqsədi ilə normativ hüquqi aktların təkmilləşdirilməsi; təhsil müəssisələrinin və tədris proqramlarının sağlamlıq imkanları məhdud şəxslərin ehtiyaclarına uyğunlaşdırılması üçün tədbirlərin görülməsi; sağlamlıq imkanları məhdud şəxslərin təhsilinin təşkili ilə bağlı pedaqoji kadrların hazırlanması və ya əlavə təhsilə cəlb olunması; inklüziv (inteqrativ) təhsilə cəlb olunan sağlamlıq imkanları məhdud şəxslər üzrə məlumat bazasının yaradılması; sağlamlıq imkanları məhdud şəxslərin təhsilə cəlb olunması və sosial inteqrasiyasının vacibliyi barədə aidiyyəti dövlət qurumları ilə birlikdə təbliğat və ictimai maarifləndirmə işinin aparılması.
Dövlət proqramının həyata keçirilməsi ilə bağlı tələb olunan xərclər büdcədə Təhsil Nazirliyi və aidiyyəti dövlət qurumları üçün nəzərdə tutulmuş vəsaitlər, habelə digər qanuni mənbələr hesabına maliyyələşdirilir.
