Sabiq nazir məhkəmə zalında həbs edildi
Dekabrın 15-də Moskvanın Zamoskvoretski Rayon Məhkəməsində Rusiyanın sabiq iqtisadi inkişaf naziri Aleksey Ulyukayevin işi üzrə proses başa çatıb. Novator.az-ın məlumatına görə, Aleksey Ulyukayev 8 il müddətinə azadlıqdan məhrum edilib, məhkəmə zalında həbs olunub.
Bundan başqa sabiq iqtisadi inkişaf nazirinə 130 milyon rubl cərimə kəsilib.
Bu vaxta qədər ev dustağı olan Aleksey Ulyukayevə ötən il noyabrın 15-də Rusiyanın İstintaq Komitəsi cinayət işi qaldırıb, həmin gün o, nazir postundan azad edilib.
Sabiq nazir 2 milyon dollar rüşvət almaqda təqsirli bilinir. Aleksey Ulyukayevin “Başneft” şirkətinin aksiyalarının alınmasına razılıq vermək üçün “Rosneft” şirkətindən 2 milyon dollar alarkən tutulduğu açıqlanıb.
61 yaşlı Aleksey Ulyukayev iqtisadi inkişaf naziri postunu 2013-cü ildən tutub.
