Məzənnələr dekabrı yarıladı
Dekabrın 15-də Mərkəzi Bank avro, Rusiya rublu və türk lirəsini ucuzlaşdırıb. ABŞ dollarının kursu sabit qalıb, gürcü larisində isə bahalaşma qeydə alınıb. Novator.az-ın məlumatına görə, dollar 1,7001, avro 2,0032, lari 0,6654, rubl 0,0289, lirə 0,4379 manata satılır (Məzənnələr).
2017-ci ildə dollar 1,7707 manatla start götürüb. Ən yuxarı rəsmi qiymət yanvarda 1,9165 manat, fevralda 1,92 manat, martda 1,7563 manat, apreldə 1,7244 manat, mayda 1,7026 manat, iyunda 1,7023 manat, iyulda 1,7022 manat, avqust və sentyabrda 1,701 manat, oktyabr və noyabrda 1,7003 manat olub, dekabr 1,7001 manatla başlayıb.
ABŞ-ın mərkəzi bankı olan Federal Ehtiyat Sistemi (FES) dekabrın 13-də uçot dərəcəsinin yuxarı həddini1,5%-ə qaldırıb. Bu, 2017-ci ildə üçüncü artım olub. Martın 15-də uçot dərəcəsinin yuxarı həddi 1%-ə, iyunun 14-də 1,25%-ə yüksəlmişdi.
Uçot dərəcəsi kommersiya banklarına verilən borclar üzrə faiz dərəcəsidir. FES 2016-cı il dekabrın 14-də uçot dərəcəsinin 0,25% artırılması barədə qərar çıxarmış, yuxarı hədd 0,75%-ə çatmışdı.
2015-ci il dekabrın 16-da isə uçot dərəcəsinin yuxarı həddi 0,25%-dən 0,5%-ə qalxmış, bu, digər valyutalara, o sıradan Azərbaycan manatına təzyiqi artırmış, dollar birdən-birə 50 qəpik bahalaşmışdı.
