Goranboylu sahibkarlar güzəştli kreditlər aldı
İqtisadiyyat Nazirliyinin Sahibkarlığa Kömək Milli Fondu dekabrın 15-i Goranboyun Rəhimli kəndində işgüzar forum keçirib. 90-a yaxın sahibkarın iştirakı ilə keçirilən forumda qeyd edilib ki, indiyədək Gəncə-Qazax iqtisadi rayonunda 6600-ə yaxın investisiya layihəsi üçün 238,5 milyon manat güzəştli kredit ayrılıb.
Rəsmi məlumata görə, 15 dekabr forumunda Goranboy və ətraf rayonlarda fəaliyyət göstərən sahibkarlıq subyektləri 2,6 milyon manat güzəştli kredit alıb. Kreditlərin aqroparkın yaradılmasına, heyvandarlıq, əkinçilik, eləcə də bağçılıq, üzümçülük və s. sahələrin inkişafına yönəldiləcəyi bildirilir.
Ümumilikdə indiyədək Goranboy rayonundan olan 985 sahibkara 17,8 milyon manat güzəştli kredit verildiyi açıqlanıb.
