Noyabrın miqrasiya pozuntuları
Dövlət Miqrasiya Xidməti bu ilin noyabr ayında qanunvericiliyin tələblərinin pozulmasına görə 1434 qərar qəbul edib. Rəsmi məlumata əsasən, qərarlardan 205-i ölkədə yaşamağın leqallaşdırılmasını, 780-i cəriməni, 407-si ölkə hüdudlarından kənara çıxarılmaqla cəriməni, 23-ü ölkə ərazisinə gəlişi məhdudlaşdırmanı, 19-u müvəqqəti və daimi yaşamaq üçün sənədin yeni sənədlə əvəzlənməsini nəzərdə tutub.
Ümumilikdə ay ərzində xidmətə əcnəbilər və vətəndaşlığı olmayan şəxslərdən ölkədə müvəqqəti olma müddətlərinin uzadılması, müvəqqəti və daimi yaşamaq üçün icazələrin alınması, vətəndaşlığa qəbul, xitam, bərpa, eləcə də vətəndaşlıq mənsubiyyətinin və qaçqın statusunun müəyyənləşdirilməsi, həmçinin əmək fəaliyyətinin həyata keçirilməsi üçün iş icazələrinin alınması və mövcud iş icazələrinin müddətlərinin uzadılması ilə bağlı 7 min 630 müraciət daxil olub. Olduğu yer üzrə qeydiyyatla bağlı 52 min 988 əcnəbi və vətəndaşlığı olmayan şəxslərin müraciəti qeydə alınıb.
