Müxalif blok prezidentliyə namizəd seçdi
Ermənistan parlamentindəki müxalif “Çıxış” bloku prezidentliyə namizədini müəyyənləşdirib. Novator.az-ın məlumatına görə, blok seçkiyə Artak Zeynalyanın namizədliyi ilə gedir.
Artak Zeynalyan 1969-cu ildə Yerevanda anadan olub. Ermənistan Tibb Universitetini, Milli Səhiyyə İnstitutunu, Ermənistan İdarəçilik Akademiyasını, Qladzor İdarəçilik Universitetini bitirib. Cərrahdır.
1998-2001-ci illərdə səhiyyə nazirinin müavini olub. Bəzi hüquq müdafiə təşkilatlarında çalışıb.
2018-ci ildə Serj Sərkisyanın prezident səlahiyyətləri başa çatandan sonra Ermənistanda icra hakimiyyəti və dövlət idarəçiliyi sisteminə ümumi rəhbərliyi hökumət həyata keçirəcək. Yalnız dövlət başçısı funksiyasını daşıyacaq prezidenti isə parlament seçəcək.
“Çıxış” blokunu müxalif İşıqlı Ermənistan, Vətəndaş Sazişi, Respublika partiyaları qurub. Blokun 9 deputatı var. Onlardan biri Artak Zeynalyandır. Artak Zeynalyan Respublika Partiyasının üzvüdür.
