Gözəl Bayramlı ilə bağlı bəyanat araşdırılacaq
Qazax Rayon Məhkəməsində AXCP sədrinin müavini Gözəl Bayramlının məhkəməsi olub. “Azadlıq” radiosu bildirir ki, dekabrın 13-də keçirilən prosesdə Gözəl Bayramlı təqsiri olmadığını deyərək şahidlər dindiriləndən sonra ifadə verəcəyini bəyan edib.
Vəkil Elçin Sadıqov vəsatət qaldıraraq deyib ki, hadisədən dərhal sonra Dövlət Sərhəd Xidməti yaydığı bəyanatda Gözəl Bayramlının təqsirsizlik prezumpsiyası hüququnu pozub. O, bəyanatın cinayət işinin materiallarına əlavə edilməsini və sənədlərin tədqiqi mərhələsində araşdırılmasını istəyib. Vəsatət təmin olunub.
Məhkəmədə gömrük-keçid məntəqəsinin əməkdaşları Anar Hüseynəliyev, Elmar Yusifov, Şəmkir Sərhəd Dəstəsinin təhqiqatçısı Allahverdi Məmmədov və Almaz Rəhimova, Aidə Əhmədova, Atlas Əmirxanova adlı qadınlar şahid qismində dindirilib.
Proses dekabrın 26-da davam edəcək.
Gözəl Bayramlı Cinayət Məcəlləsinin 206.1-ci maddəsi ilə qaçaqmalçılıqda ittiham olunur. Ona qarşı cinayət işi Dövlət Sərhəd Xidmətinin İstintaq və Təhqiqat İdarəsində başlanıb. Sonradan istintaqı Baş Prokurorluğun Ağır Cinayətlərə Dair İşlər üzrə İstintaq İdarəsi aparıb.
Gözəl Bayramlı mayın 25-i axşam Gürcüstandan Azərbaycana gələrkən Qazax rayonunun Şıxlı sərhəd nəzarət buraxılış məntəqəsində saxlanıb. Rəsmi məlumata görə, onun üstündən bəyan edilməmiş 12 min ABŞ dolları çıxıb.
Mayın 26-da Gözəl Bayramlı Bakıya gətirilib, mayın 27-nə keçən gecə Səbail Rayon Məhkəməsi onun barəsində həbs qətimkan tədbiri seçib.
