Dövlət Sərhəd Xidməti ilə yekun vurur
Dövlət Sərhəd Xidmətinin xidməti-döyüş fəaliyyətinin yekunlarına həsr olunmuş illik hesabat müşavirəsi keçirilib. Rəsmi məlumata görə, dekabrın 13-də keçirilən müşavirədə çıxış edən Dövlət Sərhəd Xidmətinin rəisi Elçin Quliyev deyib ki, 2017-ci ildə Azərbaycana qarşı kəşfiyyat-pozuculuq fəaliyyəti üçün xarici xüsusi xidmət orqanları ilə əlaqədə şübhəli bilinən 10 nəfər, məxfi əməkdaşlığa cəlb olunmuş 1 nəfər müəyyən edilib: “Xarici münaqişə zonalarında döyüşmüş 30 nəfərin şəxsiyyəti müəyyən olunub, 5 nəfər Azərbaycan vətəndaşı, 2 nəfər əcnəbi saxlanıb, qanunsuz miqrasiya ilə məşğul olan 5 qrup, qaçaqmalçılıq, narkotik vasitələrin qanunsuz dövriyyəsi ilə məşğul olan 8 mütəşəkkil cinayətkar dəstə zərərsizləşdirilib.
Dövlət sərhədini pozan 503 nəfər, sərhədboyu rejim qaydalarını pozan 12 min 241 nəfər, axtarışda olan 4686 nəfər tutulub. 13 milyon 72 min manat dəyərində qaçaqmalın, 156 kiloqram 556,6 qram narkotik vasitənin dövlət sərhədindən qanunsuz keçirilməsinin qarşısı alınıb”.
