İstanbulda Qüds zirvəsi
Dekabrın 13-ü İstanbulda İslam Əməkdaşlıq Təşkilatının (İƏT) sədri Türkiyənin təşəbbüsü ilə Qüds məsələsinə dair fövqəladə zirvə toplantısı keçirilir. Azərbaycan prezidenti İlham Əliyev də toplantıda iştirak edir.
“Qüdslə həmrəylik üçün birlikdə hərəkət” devizi altında keçirilən zirvə toplantısına 48 ölkədən təmsilçi qatılıb, onlardan 16-sı dövlət və hökumət başçısıdır.
Dekabrın 6-da ABŞ prezidenti Donald Tramp Yerusəlimi (Qüdsü) İsrailin paytaxtı kimi tanıdığını bəyan edib, ölkəsinin səfirliyinin Tel-Əvivdən həmin şəhərə köçürülməsi barədə qərar imzalayıb. Bu qərar dünyada, özəlliklə müsəlman dünyasında sərt etirazla qarşılanıb.
Novator.az bildirir ki, 1947-ci ildə yaradılmış İsrail Dövləti 1949-cu ildə Yerusəlimi özünün paytaxtı elan edib. 1967-ci ildə İsrail hərbi güclə bütün şəhəri, eyni zamanda Fələstinin başqa ərazilərini tutub. Dünya birliyi bu ilhaqı tanımır, işğal edilən ərazilərin, o cümlədən Qüdsün şərq hissəsinin Fələstinə qaytarılmasını istəyir.
1995-ci ildə ABŞ Konqresi ölkənin İsraildəki səfirliyinin Tel-Əvivdən Yerusəlimə köçürülməsi barədə qanun qəbul edib. Amma Donald Trampdan əvvəlki prezidentlər bu qanunun icrasını təxirə salıblar.
