Aclıq davam edir
Ukrayna müxalifətinin əsas liderlərindən olan Mixail Saakaşvili istintaq təcridxanasında aclıq aksiyası keçirir. Novator.az-ın məlumatına görə, dekabrın 11-də Saakaşviliyə baş çəkən vəkil Ruslan Çernolutski jurnalistlərə deyib ki, siyasətçi yalnız su içir. Vəkil Saakaşvilinin özünü yaxşı hiss etdiyini, ona bəzi şəxsi əşyalar, kitablar verdiyini bildirib.
Saakaşvili dekabrın 8-i axşam tutulub. O, cinayətə cəhddə, qabaqcadan əlbir olan bir qrup şəxsin cinayət törətməsində, cinayət təşkilatları üzvləri ilə davamlı işbirliyi və onların cinayət fəaliyyətini ört-basdır etməkdə ittiham olunur.
Paytaxt Kiyevdə, Ukrayna Təhlükəsizlik Xidmətinin təcridxanasında saxlanan Saakaşvilinin bu gün məhkəmə qarşısına çıxarılacağı bildirilir.
Ukrayna Təhlükəsizlik Xidməti və Baş Prokurorluq əməkdaşlarının dekabrın 5-i paytaxt Kiyevdə, yaşadığı evdə tutduğu Saakaşvilini hüquq mühafizə orqanlarına aparmaq mümkün olmamışdı. Tərəfdarları onu aparıldığı avtomobildən çıxarıb azad etmişdilər.
1967-ci il təvəllüdlü Saakaşvili 2004-2013-cü illərdə Gürcüstanın prezidenti olub. 2013-cü ildə ölkəsini tərk edib. Gürcüstanda onun haqqında bir neçə cinayət işi qaldırılıb.
2015-ci ildən Ukraynada yaşayan sabiq prezident bu ölkədə vətəndaşlıq alıb, həmin il Odessa vilayətinin qubernatoru təyin edilib.
2015-ci il dekabrın 4-də Saakaşvili Gürcüstan vətəndaşlığından məhrum edilib. Buna əsas kimi Saakaşvilinin başqa ölkənin vətəndaşlığını qəbul etməsi göstərilib.
2016-cı il noyabrın 7-də Saakaşvili Ukrayna prezidenti Poroşenkonu korrupsionerləri himayə etməkdə günahlandıraraq Odessa qubernatoru vəzifəsindən istefa verib və noyabrın 10-da postundan azad edilib.
2017-ci il iyulun 25-də Poroşenko Saakaşvilini vətəndaşlıqdan çıxarıb. Buna Saakaşvilinin vətəndaşlıq alarkən anketdə həqiqətə uyğun olmayan məlumatlar göstərməsi əsas gətirilib.
Bir müddət Avropada dolaşan Saakaşvili Ukrayna vətəndaşlığından çıxarılması ilə barışmayıb. Sentyabrın 10-da Saakaşvili bir qrup tərəfdarı ilə Polşa-Ukrayna sərhədində sərhədçilərin və polis əməkdaşlarının qurduğu sipəri yararaq ölkə ərazisinə keçib.
O, Yeni Qüvvələr Hərəkatı yaradaraq Ukrayna hakimiyyətinə qarşı mübarizə aparır, növbədənkənar seçkilərə çağırır, Poroşenkonun istefasını tələb edir.
