Rusiya bayrağı endirildi
Beynəlxalq Olimpiya Komitəsinin İcraiyyə Komitəsi Rusiyanı 2018-ci ilin fevralında Cənubi Koreyanın Pxençan şəhərində keçiriləcək Qış Olimpiya Oyunlarından kənarlaşdırıb. Dekabrın 5-i Lozannada verilən qərar rusiyalı idmançıların yarışlarda olimpiya bayrağı altında iştirakını nəzərdə tutur.
Novator.az bildirir ki, Rusiya Olimpiya Komitəsi qərara tabe olub-olmamaq məsələsini dekabrın 12-də müzakirə edəcək.
Beynəlxalq Olimpiya Komitəsinin qərarı 2014-cü ildə Soçidə keçirilmiş Qış Olimpiya Oyunlarında ən çox qızıl medal almış Rusiyanın bəzi idmançılarının dopinqdən istifadəsinin üzə çıxması ilə bağlıdır. Qərara əsasən, Rusiyanın İdman Nazirliyi Pxençandakı Qış Olimpiya Oyunlarına dəvət almayacaq. Dopinqdən yararlanmamış rusiyalı idmançılar isə Pxençanda yalnız Rusiyanın olimpiya atletləri adı və olimpiya bayrağı altında çıxış edə bilərlər. Rusiyanın dövlət bayrağının qaldırılması, dövlət himninin çalınması qadağandır.
Rusiyalı idmançıların 2014-cü il olimpiadasında dopinqdən dövlət səviyyəsində istifadəsinə görə ölkə 11 medaldan məhrum edilib, komanda hesabında ilk yerdən məhrum olub.
Beynəlxalq Olimpiya Komitəsinin 5 dekabr qərarı ilə 2014-cü ildə Rusiyanın idman naziri postunu tutmuş Vitali Mutko və idman nazirinin keçmiş müavini Yuri Naqornıx olimpiya oyunlarından ömürlük uzaqlaşdırılıb. Vitali Mutko hazırda baş nazirin müavini və Rusiya Futbol İttifaqının prezidentidir.
Rusiya Olimpiya Komitəsinin boynuna dopinqlə mübarizə üçün 15 milyon dollar ödəniş eləmək öhdəliyi də qoyulub. Bu qurum 2014-cü il olimpiadasındakı qalmaqalı araşdırmağa sərf olunmuş pulu da ödəməlidir.
