Romada nöqtə
UEFA Çempionlar Liqasının qrup mərhələsində son tura start verilib. C qrupundakı Azərbaycan təmsilçisi “Qarabağ” dekabrın 5-i İtaliya paytaxtında “Roma” klubuna 0:1 hesabı ilə uduzub. İngiltərə “Çelsi”si isə Londonda İspaniyanın “Atletiko” komandası ilə sülh bağlayıb – 1:1.
Bu nəticələrdən sonra “Roma” qrup birincisi olaraq 1/8 finala çıxıb. Növbəti raunda vəsiqəni ötən tur təmin etmiş “Çelsi” ikinci yerlə kifayətlənib. “Atletiko” üçüncü pillənin sahibi kimi Avropa Liqasına transfer olunub. 2 xalla sonuncu pillədə qalan “Qarabağ”ın isə ələnməsi rəsmiləşib.
5 dekabr oyunlarında A qrupundan “Mançester Yunayted” (İngiltərə), “Bazel” (İsveçrə), D qrupundan “Yuventus” da (İtaliya) mərhələ keçiblər.
B qrupundan “Bavariya” (Almaniya) və PSJ (Fransa), D qrupundan “Barselona” (İspaniya), F qrupundan “Mançester Siti” (İngiltərə), G qrupundan “Beşiktaş” (Türkiyə), H qrupundan “Tottenhem” (İngiltərə), “Real” (İspaniya) 1/8 finala daha əvvəl adlayıblar.
