Vergilər Nazirliyi xüsusi qərargah yaratdı
Vergilər Nazirliyində dövlət büdcəsinin proqnoz gəlirlərinin icrası və qarşıda duran vəzifələrə həsr olunmuş kollegiya iclası keçirilib. Dekabrın 5-də Novator.az-a verilən rəsmi məlumata görə, iclasda çıxış edən vergilər naziri Fazil Məmmədov ölkədə iqtisadi fəallığın artdığını vurğulayaraq deyib ki, 2017-ci ilin 10 ayı ərzində 134 566 yeni vergi ödəyicisi (o cümlədən 9864 hüquqi, 124 702 fiziki şəxs) qeydiyyatdan keçib: “Müvafiq dövr ərzində yüksək dövriyyəyə malik 3189 ƏDV ödəyicisi (2 359 hüquqi şəxs, 830 fiziki şəxs) qeydiyyata alınıb. Ümumilikdə 10 ay ərzində qeydiyyata alınmış və fəaliyyətini bərpa etmiş vergi ödəyicilərinin sayı fəaliyyətini dayandırmış və ləğv edilmiş vergi ödəyicilərinin sayından 18028 sayda çox olub”.
Kollegiya iclasında büdcə proqnozlarının dəqiq və vaxtında icrasının təmin edilməsi məqsədilə xüsusi qərargah yaradılıb. Qərargaha analitik təhlillər əsasında vergi potensialını dəqiq və vaxtında müəyyənləşdirmək, müəyyən edilmiş potensial üzrə vergi daxilolmalarının təmin edilməsi üçün zəruri və məqsədəmüvafiq vergi nəzarəti növlərini seçmək, nazirliyin struktur vahid və bölmələri arasında koordinasiyanın qurulması, büdcə proqnozlarının icrası ilə məşğul olan funksional strukturların gündəlik iş bölgüsünü müəyyən etməklə zərurət yarandıqda vergi daxilolmalarının təmin olunması məqsədilə inzibatçılıq, struktur, kadr və intizam məsuliyyəti məsələlərinə dair təkliflər təqdim etmək tapşırılıb.
