Sərkisyan təlim mərkəzində
Ermənistan prezidenti Serj Sərkisyanın Azərbaycanın işğal olunmuş ərazisinə qanunsuz səfəri dekabrın 4-də yeni hərbi texnikanın sınaqdan çıxarılması ilə davam edib. Novator.az-ın məlumatına görə, həmin gün Serj Sərkisyan separatçı Dağlıq Qarabağ rejiminin başçısı Bako Saakyanla birgə “Asparez” təlim mərkəzinə baş çəkib. Təlim mərkəzində Ermənistan istehsalı olan yeni hərbi texnika nümayiş etdirilib.
Serj Sərkisyan həmçinin Dağlıq Qarabağda yeni hərbi kazarmaların, əsgər klubunun açılışlarına qatılıb.
İşğalçı lider Xankəndidə marşal Baqramyanın abidəsini də ziyarət edib. Şəmkir rayonunun Çardaxlı kəndində doğulmuş marşalın (1897-1982) dekabrda 120 illik yubileyi qeyd olunur.
Serj Sərkisyan dekabrın 1-i Xankəndidə hərbi müşavirəyə qatılmış, dekabrın 2-də isə hərbi təlimi izləmiş, işğalçı orduya məxsus bəzi obyektlərə baş çəkmişdi.
1988-ci ilin fevral ayında Dağlıq Qarabağ erməniləri bölgəni Ermənistana birləşdirmək tələbi ilə separatçı hərəkata, işğalçı müharibəyə başlayıb. 1991-ci il sentyabrın 2-də Dağlıq Qarabağ özünü müstəqil dövlət elan edib. 1994-cü ildə atəşkəslə dayanan müharibədə Ermənistan Silahlı Qüvvələri Dağlıq Qarabağı və onun ətrafındakı 7 rayonu tutub.
2008-ci ildən prezident postunu tutan Serj Sərkisyan 28-ci dəfədir Azərbaycanın Qarabağ bölgəsinə qanunsuz səfər edir. 1954-cü ildə Xankəndidə doğulan Serj Sərkisyan işğalçı müharibənin qaniçən liderlərindən biridir. 1989-cu ildən Dağlıq Qarabağ separatçılarının komandanı, 1993-cü ildən Ermənistanın müdafiə naziri olub.
1995-2008-ci illərdə Serj Sərkisyan Dövlət Təhlükəsizliyi İdarəsinin rəisi (sonradan milli təhlükəsizlik naziri), daxili işlər və milli təhlükəsizlik naziri (sonradan yenə milli təhlükəsizlik naziri), Prezident Aparatının rəhbəri, Milli Təhlükəsizlik Şurasının katibi (eyni zamanda müdafiə naziri), baş nazir kürsülərini tutub.
