Respublika Veteranlar Təşkilatının yeni sədri təsdiqləndi
General-polkovnik Tofiq Ağahüseynov Respublika Veteranlar Təşkilatının sədri vəzifəsinə təsdiq olunub. Novator.az xəbər verir ki, qərar Azərbaycan Respublikası Müharibə, Əmək və Silahlı Qüvvələr Veteranları Təşkilatının VII plenumunda qəbul edilib.
Plenum dekabrın 5-də keçirilib. Tədbirdə dövlət və hökumət nümayəndələri, Milli Məclisin deputatları, təşkilatın üzvləri, müharibə, əmək, Silahlı Qüvvələr və Qarabağ müharibəsi veteranları iştirak ediblər.
Bu ilin payızınadək Respublika Veteranlar Təşkilatına general-mayor Dadaş Rzayev sədrlik edib. O, sentyabrın 12-də Azərbaycan Respublikası Müharibə, Əmək və Silahlı Qüvvələr Veteranlar Təşkilatının Rəyasət Heyətinin iclasında çıxarılan qərarla vəzifəsindən azad edilib. Qərar general-mayor Dadaş Rzayevin səhhətində yaranmış problemlərlə əlaqələndirilib. Həmin qərarla Respublika Veteranlar Təşkilatının sədri vəzifəsinin icrası Tofiq Ağahüseynova həvalə olunmuşdu.
Tofiq Ağahüseynov 1923-cü ilin fevralında Şəkidə doğulub. İkinci Dünya müharibəsində sovet ordusunda vzvod komandiri, əlahiddə zenit artilleriyası divizionunda qərargah rəisinin köməkçisi olub, Visla-Oder və Berlin əməliyyatlarında iştirak edib.
1960-64-cü illərdə Hövsanda yerləşən Hava Hücumundan Müdafiə polkuna komandirlik edib, 1964-cü ilin sonlarında Volqoqrada göndərilib və orada diviziya komandiri kimi çalışıb. 1968-ci ildə general-mayor rütbəsi alıb. 1969-cu ildən Rostovda korpus komandiri olub.
1972-ci ildə general-leytenant rütbəsi alan Tofiq Ağahüseynov 1975-ci ildə Bakı Dairəsi hava hücumundan müdafiə komandanının birinci müavini təyin edilib. 1980-ci ildə general-polkovnik rütbəsinə layiq görülüb, həmçinin ona Bakı Dairəsi hava hücumundan müdafiə komandanı vəzifəsi həvalə edilib. 1982-ci ildə Varşava Müqaviləsi dövlətlərinin birləşmiş silahlı qüvvələri baş komandanlığının Çexoslovakiyadakı nümayəndəsi olub.
Tofiq Ağahüseynov SSRİ Silahlı Qüvvələrində general-polkovnik rütbəsi almış ilk azərbaycanlıdır.
Müstəqillik dövründə o, general-polkovnik rütbəsində Azərbaycan Milli Ordusu sıralarına bərpa edilib. 1997-2002-ci illərdə Azərbaycan prezidentinin hərbi məsələlər üzrə köməkçisi işləyib.
