Pensiyalar nə qədər artacaq?
“Əmək pensiyaları haqqında” qanunda yeniliyə görə, pensiyaları indeksləşdirmə qaydası dəyişib. 2018-ci ildən pensiyanın sığorta hissəsi və fərdi hesabın sığorta hissəsində qeydə alınan pensiya kapitalı ildə bir dəfə ölkə üzrə orta aylıq nominal əməkhaqqının illik artım tempinə uyğun indeksləşdiriləcək.
Novator.az-ın məlumatına görə, iqtisadçı ekspert Vüqar Bayramov yazır ki, yeni qanunvericilik indekləşdirmədə iki dəyişikliyi nəzərdə tutur: “Birincisi, pensiya məbləği əvvəlki ilin rəsmi inflyasiya səviyyəsinə deyil, orta aylıq əməkhaqqındakı artım faizinə indeksasiya ediləcək. İkincisi, pensiyaların baza hissəsi ləğv edildiyi üçün bütövlükdə pensiya məbləği indeksasiya olunacaq”.
Vüqar Bayramov qeyd edir ki, Dövlət Statistika Komitəsi bu ilin 9 ayında orta aylıq əməkhaqqının 7,2 faiz artdığını açıqlayıb: “Doğrudur, 2017-ci ildə orta aylıq əməkhaqqı məbləğində 6,2 faiz artım proqnozlaşdırılır. Bununla belə, faktiki göstərici ciddi dəyişməsə, o zaman gələn il pensiya məbləğlərində təxminən 7 faiz artım qeydə alınacaq. Orta pensiya məbləğinin 204 manat olduğunu nəzərə alsaq, orta pensiya 15 manata yaxın artacaq. Baza hissəsi ləğv olunduğu üçün hər bir pensiyaçı aldığı pensiyanın üzərinə orta aylıq əməkhaqqındakı artım faizini əlavə edərək yeni məbləği hesablaya bilər. İndeksasiyanın birrəqəmli olduğunu nəzərə alsaq, 2018-ci ildə pensiya məbləğlərinin yenidən artırılması və xüsusən də orta pensiya məbləğinin yüksəldilməsi əsas prioritetlərdən olmalıdır”.
