Mikayıl Cabbarov vergilər naziri oldu
Dekabrın 5-də prezident İlham Əliyevin imzaladığı sərəncamlara əsasən, Mikayıl Cabbarov təhsil naziri vəzifəsindən azad olunaraq vergilər naziri təyin edilib.
Dövlət başçısı 2000-ci ilin fevralından vergilər naziri olan Fazil Məmmədovu da həmin gün işdən çıxarıb.
Novator.az xəbər verir ki, Mikayıl Cabbarov 1976-cı il sentyabrın 19-da Bakı şəhərində doğulub. 1997-ci ildə Bakı Dövlət Universitetinin beynəlxalq hüquq fakültəsini bitirib. 1998-ci ildə ABŞ-ın Pasifik Universitetində hüquq üzrə, 2004-cü ildə Azərbaycan Dövlət İqtisad Universitetində iqtisadiyyat üzrə magistr dərəcələri alıb.
Əmək fəaliyyətinə 1995-ci ildən bank sektorunda başlayıb, 1999-2002-ci illərdə hüquq şirkəti və özəl sektorda hüquqşünas kimi fəaliyyət göstərib.
2002-2003-cü illərdə iqtisadi inkişaf nazirinin müşaviri, 2003-2004-cü illərdə Azərbaycanda İxracın və İnvestisiyaların Təşviqi Fondunun (AZPROMO) prezidenti vəzifələrində çalışıb.
2004-cü ildə iqtisadi inkişaf nazirinin müavini vəzifəsinə, 2009-cu ildə Nazirlər Kabineti yanında “İçərişəhər” Dövlət Tarix-Memarlıq Qoruğu İdarəsinin rəisi vəzifəsinə təyin edilib.
2013-cü il aprelin 19-dan təhsil naziri idi.
