Jurnalistə 7 il həbs verilməsi təklif olundu
Dekabrın 5-də Bakı Ağır Cinayətlər Məhkəməsində “Kanal 13” internet televiziyasının direktoru Əziz Orucovun işi üzrə proses davam etdirilib.
Jurnalistin həyat yoldaşı Lamiyə Orucova Novator.az-a bildirib ki, hakim Mirzə Xankişiyevin sədrliyi ilə keçirilən prosesdə prokuror Ramin Nağdəliyev Əziz Orucova 7 il həbs cəzası verilməsini təklif edib.
Dövlət ittihamçısnın çıxışından sonra Əziz Orucovun vəkilləri müdafiə nitqinə hazırlaşmaq üçün məhkəmədən vaxt istəyiblər.
Müdafiə tərəfinə dekabrın 12-dək vaxt verilib.
Lamiyə Orucova prokurorun təklifini ədalətsiz saydıqlarını, amma məhkəmənin ədalətinə hələ ümid etdiklərini söyləyib.
Əziz Orucov mayın 2-də polisə müqavimətdə təqsirli bilinərək 30 sutka inzibati həbs cəzası alıb. Sonra ona Cinayət Məcəlləsinin 192.2-ci (qanunsuz sahibkarlıqla külli miqdarda gəlir əldə etmə) və 308.2-ci (ağır nəticələrə səbəb olan vəzifə saxtakarlığı) maddələri ilə cinayət işi başlanıb, haqqında həbs qətimkan tədbiri seçilib. İstintaqı Baş Prokurorluğun Ağır Cinayətlərə Dair İşlər üzrə İstintaq İdarəsi aparıb.
İstintaq orqanı Əziz Orucovu dövlət qeydiyyatına alınmamış qrant vəsaitlərindən külli miqdarda qanunsuz gəlir əldə etməkdə təqsirli bilir.
Əziz Orucovun məhkəməsi oktyabrın 10-da başlayıb. Jurnalistin hüquqlarını vəkillər Cavad Cavadov və Əlibaba Rzayev müdafiə edirlər.
