“Azadlıq” xarici agent kimi tanındı
Rusiyanın Ədliyyə Nazirliyi ölkədə fəaliyyət göstərən 9 KİV-i xarici agent siyahısına daxil edib.
Noyabrın 25-də prezident Vladimir Putin KİV haqqında qanuna noyabrın 15-i Dövlət Dumasında, noyabrın 22-si Federasiya Şurasında qəbul edilən dəyişiklikləri imzalayıb.
Beləliklə, Rusiyada xaricdən maliyyələşən, o cümlədən beynəlxalq təşkilatların maliyyələşdirdiyi qəzet-jurnalların, radio və televiziyaların, internet nəşrlərinin xarici agent kimi tanınması proseduruna start verilib.
Yeni qanun xarici agent sayılan qeyri-kommersiya təşkilatlarına tətbiq olunan müddəaları xaricdən maliyyələşən KİV-ə də tətbiq edir.
Novator.az-ın məlumatına görə, Ədliyyə Nazirliyi xarici agent kimi tanıdığı KİV-lərin siyahısına “Amerikanın səsi” və “Azadlıq” radiolarını, bu radioların birgə layihəsi olan Factograph.info saytını, “Azadlıq” radiosunun internet layihələri olan “Kafkaz.Realii” (Kavkazr.com), “İdel.Realii” (İdelreal.org), “Krım.Realii” (Ru.krymr.com), “Sibir.Realii” (Sibreal.org) saytlarını, “Azadlıq” radiosunun Tatar-Başqırd xidmətini və “Nastoyaşeye Vremya” telekanalını daxil edib.
Xarici agent sayılan KİV-in jurnalistinə parlamentə – həm Dövlət Dumasına, həm də Federasiya Şurasına giriş qadağan olunur.
Moskva bu qanunu ABŞ-da bəzi Rusiya KİV-inin xarici agent kimi tanınaraq sıxışdırılmasına cavab aktı kimi qəbul edib. Rusiya Xarici İşlər Naziriliyi bəyan edib ki, Vaşinqton bu məsələdə mövqeyini yumşaltsa, Moskva da yumşala bilər.
Səidə Hüseynova
