Manatı qorumağa nə qədər pul gedib?
Dövlət Neft Fondu 2017-ci ildə manatın sabitliyini qorumağa 3 milyard 12,3 milyon dollar və 2 milyard 448,3 milyon manat sərf edib.
Dekabrın 4-də yayılan rəsmi hesabata görə, fond noyabrın valyuta hərraclarında 208,9 milyon ABŞ dolları məbləğində vəsait satıb.
Mərkəzi Bankın noyabr ayına qədər keçirdiyi hərraclarda satılan valyutanın həcmi 2 milyard 803,4 milyon ABŞ dolları olmuşdu. Novator.az saytı bildirir ki, 11 ayın hərraclarında fonddan üst-üstə 3 milyard 12,3 milyon dollar məbləğində vəsait alınıb.
Dövlət Neft Fondunun 9 aylıq hesabatına görə, yanvar-sentyabr aylarında makroiqtisadi sabitliyin təmin edilməsi üçün Mərkəzi Banka 2 milyard 448,3 milyon manat köçürülüb.
2017-ci ildə Mərkəzi Bank ABŞ dollarını 7,06 qəpik ucuzlaşdırıb. Hazırda dollar banklara 1,7001 manata satılır. Bu, ilin əvvəli ilə müqayisədə 7,06 qəpik aşağı qiymətdir. Yanvar ayı 1,7707 manatla start götürmüşdü.
Ən yuxarı rəsmi qiymət yanvarda 1,9165 manat, fevralda 1,92 manat, martda 1,7563 manat, apreldə 1,7244 manat, mayda 1,7026 manat, iyunda 1,7023 manat, iyulda 1,7022 manat, avqust və sentyabrda 1,701 manat, oktyabr və noyabrda 1,7003 manat olub.
