Razılaşma nefti bahalaşdırdı
Dekabrın 1-i dünya birjalarında neftin qiyməti qalxıb. London birjasında “Brent” markalı neftin bir barreli 28 sent bahalaşaraq 62,91 dollar, Nyu-York birjasında “Layt” markalı neftin bir barrelinin qiyməti 19 sent yüksələrək 57,59 dollar olub.
AZƏRTAC xəbər verir ki, “AzəriLayt” markalı neftin bir barreli 1 sent ucuzlaşaraq 64,49 dollara düşüb.
Azərbaycanın 2017-ci il büdcəsində neftin qiyməti 40 dollar hesablanıb. Novator.az-ın məlumatına görə, “AzəriLayt” yanvara 55,97 dollarla, fevrala 56,79 dollarla, marta 56,68 dollarla, aprelə 53,62 dollarla, maya 53,04 dollarla, iyuna 51,01 dollarla, iyula 48,57 dollarla, avqusta 53,60 dollarla, sentyabra 54,55 dollarla, oktyabra 57,51 dollarla, noyabra 62,2 dollarla start verib.
Noyabrın 30-da Vyanada Neft İxrac edən Ölkələr Təşkilatı (OPEK) Nazirlər Şurasının iclası keçirilib. İclasda OPEK+ sazişinin müddətini daha 9 ay, yəni gələn ilin sonunadək uzatmaq qərara alınıb.
2016-cı il noyabrın 30-da OPEK üzrə gündəlik neft hasilatının 1,2 milyon barrel azaldılaraq 32,5 milyon barrelə endirilməsi barədə razılıq əldə olunub. Dekabrın 10-da isə Vyanada OPEK üzvləri ilə təşkilata daxil olmayan 11 ölkə, o cümlədən Azərbaycan ümumi hasilatın sutkada 558 min barrel azaldılması barədə sazişə imza atıb.
2017-ci il mayın 25-də sazişin müddətinin 2018-ci il aprelin 1-dək uzadılması barədə razılıq əldə olunub. Ona görə də OPEK+ sazişinin müddətinin 9 ay uzadılması barədə 2017-ci il noyabrın 30-da qəbul edilmiş qərar 2018-ci il aprelin 1-dən hesablanacaq.
