Neftlə bağlı qərar daha 9 ay uzadıldı
Noyabrın 30-da Vyanada Neft İxrac edən Ölkələr Təşkilatı (OPEK) Nazirlər Şurasının iclası keçirilib. İclasda OPEK+ sazişinin müddətini daha 9 ay, yəni gələn ilin sonunadək uzatmaq qərara alınıb.
Məlumatı AZƏRTAC Bloomberght.com-a istinadla yayıb.
2016-cı il noyabrın 30-da OPEK üzrə gündəlik neft hasilatının 1,2 milyon barrel azaldılaraq 32,5 milyon barrelə endirilməsi barədə razılıq əldə olunub. Dekabrın 10-da isə Vyanada OPEK üzvləri ilə təşkilata daxil olmayan 11 ölkə, o cümlədən Azərbaycan ümumi hasilatın sutkada 558 min barrel azaldılması barədə sazişə imza atıb.
2017-ci il mayın 25-də sazişin müddətinin 2018-ci il aprelin 1-dək uzadılması barədə razılıq əldə olunub. Ona görə də OPEK+ sazişinin müddətinin 9 ay uzadılması barədə 2017-ci il noyabrın 30-da qəbul edilmiş qərar 2018-ci il aprelin 1-dən hesablanacaq.
OPEK-in 14 üzvü var: Səudiyyə Ərəbistanı, İran, İraq, Küveyt, Birləşmiş Ərəb Əmirlikləri, Qətər, Əlcəzair, Liviya, Nigeriya, Qabon, Anqola, Ekvador, Venesuela, Ekvatorial Qvineya.
