Elçin Quliyev və Azər Mehdiyevə hökm oxundu
Ləğv edilmiş Milli Təhlükəsizlik Nazirliyinin (MTN) Antiterror Mərkəzinin rəisi olmuş general-mayor Elçin Quliyev 10 il 6 ay, həmin mərkəzin əməkdaşı olmuş polkovnik Azər Mehdiyev isə 8 il müddətinə azadlıqdan məhrum edilib.
Hökm noyabrın 30-da Bakı Hərbi Məhkəməsinin hakimi Elbəy Allahverdiyevin sədrliyi ilə keçirilən prosesdə çıxarılıb.
Məhkəmə Elçin Quliyev və Azər Mehdiyevin rütbədən məhrum olunması ilə bağlı aidiyyəti instansiyaya təqdimat göndərilməsini də qərara alıb.
Musavat.com xəbər verir ki işdə zərərçəkmiş kimi tanınan şəxslərin mülki iddiaları təmin olunmayıb. Yalnız Dövlət Təhlükəsizliyi Xidmətinin mülki iddiası təmin edilib. Hökmə əsasən, Elçin Quliyev və Azər Mehdiyevin bir sıra əmlakları dövlətin xeyrinə müsadirə olunacaq.
Məhkəmənin 13 noyabr iclasında dövlət ittihamçısı Elçin Quliyevin 15 il, Azər Mehdiyevin isə 13 il müddətinə azadlıqdan məhrum olunmasını təklif etmişdi.
Elçin Quliyev və Azər Mehdiyev 2015-ci ildə tutulublar. Onlar Cinayət Məcəlləsinin qanunsuz azadlıqdan məhrum etmə, külli miqdarda əmlak ələ keçirmək məqsədilə hədə-qorxu yolu ilə tələb etmə, əməliyyat-axtarış fəaliyyəti haqqında qanunvericiliyi pozma, vəzifə səlahiyyətlərindən sui-istifadə, rüşvət alma və digər maddələri ilə təqsirli biliniblər.
2015-ci ildə MTN-in bir sıra başqa zabitləri də həbs edilib. Onlardan bəzisinin məhkəməsi yekunlaşıb, bəziləri ilə bağlı proses isə hələ davam edir. Bütün işlərə Bakı Hərbi Məhkəməsində baxılır.
2015-ci ildəki həbslərdən bir neçə ay sonra, ilin sonunda Milli Təhlükəsizlik Nazirliyi ləğv olunub, yerində Dövlət Təhlükəsizliyi Xidməti və Xarici Kəşfiyyat Xidməti yaradılıb.
