Birgə təlimlərin sayının artırılması müzakirə olunub
Noyabrın 30-da Azərbaycanın müdafiə naziri general-polkovnik Zakir Həsənov Bakıya səfər edən Türkiyə Hərbi Hava Qüvvələrinin komandanı ordu generalı Həsən Küçükakyüzlə görüşüb. Mod.gov.az-ın məlumatına görə, Müdafiə Nazirliyində geniş tərkibdə keçirilən görüşdə Azərbaycanla Türkiyə arasında təhlükəsizlik, hərbi, hərbi-texniki və hərbi təhsil sahələrində əməkdaşlığın inkişafı, eləcə də Hərbi Hava Qüvvələri arasında əlaqələrin hazırkı vəziyyəti və perspektivləri müzakirə olunub.
Azərbaycan-Türkiyə hərbi əməkdaşlığının genişləndirilməsinin vacibliyinin vurğulandığı görüşdə təcrübə mübadiləsi məqsədilə hərbi mütəxəssislərdən ibarət ekspert qruplarının qarşılıqlı səfərlərinin, eləcə də Quru Qoşunları və Hərbi Hava Qüvvələrinin iştirakı ilə keçirilən birgə təlimlərin sayının artırılması və maraq doğuran digər məsələlər barədə ətraflı fikir mübadiləsi aparılıb.
