ABŞ Şimali Koreyanı tam təcrid etməyə çağırdı
ABŞ bütün ölkələri Şimali Koreya ilə əlaqələri tam kəsməyə çağırıb. Novator.az-ın məlumatına görə, noyabrın 29-u BMT Təhlükəsizlik Şurasının iclasında çıxış edən ABŞ nümayəndəsi Nikki Heyli deyib ki, bütün ölkələr Şimali Koreya ilə əlaqələri, o cümlədən ticarəti tam kəsməlidir: “İxrac və idxal əməliyyatlarını dayandırmaq, Şimali Koreyadan olan işçiləri ölkələrdən çıxarmaq gərəkdir”.
ABŞ-ın BMT-dəki nümayəndəsi Şimali Koreyanın bu qurumda səsvermə hüququnun alınmasına da çağırıb.
Noyabrın 29-na keçən gecə Şimali Koreya yeni ballistik raketi sınaqdan keçirib. 450 kilometr uçmaq qabiliyyəti olan raket Yaponiya sahillərindən 210 kilometr aralıya düşüb. Şimali Koreya rəsmiləri bəyan edib ki, ölkənin ABŞ-da istənilən nöqtəni nüvə silahı ilə vurmaq gücü var.
