Ümumrusiya Azərbaycan Konqresinin ləğvi rəsmiləşdi
Qeydiyyatı ləğv olunmuş Ümumrusiya Azərbaycan Konqresinin (ÜAK) Rusiya Ali Məhkəməsinin Rəyasət Heyətinə müraciəti geri qaytarılıb. Xəbəri noyabrın 28-də APA yayıb.
Rusiya Ali Məhkəməsi mayın 15-də Ədliyyə Nazirliyinin istəyi ilə ÜAK-nin qeydiyyatının ləğvinə qərar verib. Ədliyyə Nazirliyinin iddiasında 2001-ci ildən fəaliyyət göstərən ÜAK-də nəzarət-təftiş tədbirləri zamanı Rusiya qanunvericiliyinin və qurumun nizamnaməsinin pozuntularının aşkarlandığı, nöqsanların aradan qaldırılması tövsiyələrdən nəticə çıxarılmadığı əsas gətirilib.
Sentyabrın 19-da Rusiya Ali Məhkəməsinin Apellyasiya Kollegiyası birinci instansiyanın qərarını qüvvədə saxlayıb, bunun ardınca ÜAK Rəyasət Heyətinə üz tutub, Apellyasiya Kollegiyasının qərarının ləğvini istəyib.
Rəyasət Heyətinə noyabrın 2-də verilmiş kassasiya şikayəti geri qaytarıldığı üçün Ədliyyə Nazirliyi ÜAK-ni Hüquqi Şəxslərin Vahid Dövlət Reyestrindən çıxarıb, bununla da ləğv rəsmiləşib.
