UEFA-nın klub reytinqində durum
Novator.az UEFA-nın klub reytinqində duruma nəzər salıb.
Reytinq UEFA üzvlərinin Çempionlar Liqası və Avropa Liqasında son 5 mövsümdə qazandığı əmsala əsaslanır. Qrup raunduna qədər qələbə 1, heç-heçə yarım xal; qrupda və sonrakı mərhələlərdə qələbə 2, heç-heçə 1 xaldır. Çempionlar Liqasının qrupuna düşmək 4 bonus xalı, 1/8 finala çıxmaq 5 bonus xalı, hər iki turnirin 1/4 finalı, yarımfinalı və finalına yüksəlmək 1 bonus xalı verir. Toplanan xallar qitə turnirlərinə vəsiqə almış ölkə klublarının sayına bölünür və mində bir dəqiqliklə əmsal çıxarılır.
Hazırda Çempionlar Liqası və Avropa Liqasında 55 UEFA üzvündən 32-nin klubları mübarizə aparır. Avropa kuboklarına 4 klubla qoşulmuş Azərbaycanın gələn ay təmsilçisiz qalacağı dəqiqləşib. Ölkə 2017-2018 mövsümündə 4,375 əmsal əldə edib. Bu göstərici üzrə Azərbaycan 18-ci sıradadır. Qazanılan 17,5 xalın 10,5-i “Qarabağ” komandasının payına düşür. Son 5 mövsüm üzrə Azərbaycan 19,125 əmsalla 23-cü pillədə qərar tutur.
2017-2018 mövsümündə əmsala görə İngiltərə, son 5 mövsüm üzrə isə İspaniya öndədir.
