Suyu krandan içməyin xeyri nədir, ziyanı nə?
ABŞ-ın Şimali Karolina Universitetinin alimləri su kranından su içməyin xeyrini-ziyanını araşdırıblar.
Novator.az-ın məlumatına görə, araşdırma göstərib ki, suyu birbaşa krandan içən uşaqlar və yeniyetmələr diş kariyesindən daha az əziyyət çəkir, amma onların bir qisminin qanında qurğuşunun miqdarı da yüksək olur.
Tədqiqatçılar Miçiqan ştatında 2 yaşdan 19 yaşadək 15 min nəfərin səhhətini araşdırıblar. Məlum olub ki, suyu birbaşa krandan içməyənlərin 50 faizi kariyesdən əziyyət çəkir və bu, ölkə üzrə orta göstəricidən iki dəfə yüksəkdir. Alimlər bunu su xəttinə əlavə edilən flüor maddəsi ilə əlaqələndirirlər. Flüor mineral duzların diş emalından yuyulmasının qarşısını alır.
Mütəxəssislər birbaşa krandan su içməyin ziyanlı tərəflərini də aşkarlayıblar. Onlar bildirirlər ki, kran suyu içmək qanda qurğuşunun çoxalmasına səbəb olur. Amma bu risk 3 faiz təşkil etdiyindən alimlər krandan su işməyə tərəfdar çıxdıqlarını bəyan ediblər, çünki onlar suyun flüorlaşmasının insanlara xeyirli olması qənaətindədirlər.
2014-cü ildə Miçiqan ştatının Flint şəhərində su xəttində qurğuşunun normadan çox olması 100 minə yaxın insanın səhhətində problem yaratmışdı. İndiyə qədər Flint şəhərinin əhalisinə qablaşdırılmış və ya filtrdən keçirilmiş su içmək tövsiyə olunur.
Səidə Hüseynova
