Əsgərin meyiti Azərbaycana verildi
Noyabrın 28-də əsgər Bəhruz Pərviz oğlu Cəlilbəylinin meyiti Naxçıvan Muxtar Respublikasının Sədərək rayonu ərazisində Azərbaycan tərəfinə verilib.
Əsgərin meyiti noyabrın 23-də Ordubad rayonu istiqamətində qoşunların təmas xəttində, Ermənistan silahlı qüvvələrinin mövqeləri yaxınlığında aşkarlanmışdı.
Azərbaycanın Müdafiə Nazirliyi həmin gün bəyan etmişdi ki, əsgər hərbi cinayət törətdikdən sonra xidmət yerini özbaşına tərk edib.
Bəhruz Pərviz oğlu Cəlilbəyli 1998-ci ildə doğulub, 2017-ci ilin yanvarında Sədərək rayonundan həqiqi hərbi xidmətə çağırılıb.
Meyitin qaytarılması üçün Azərbaycanın Əsir və İtkin Düşmüş, Girov Götürülmüş Vətəndaşlarla Əlaqədar Dövlət Komissiyası və Müdafiə Nazirliyi zəruri tədbirlərin həyata keçirildiyini bəyan etmişdi.
Meyit Beynəlxalq Qızıl Xaç Komitəsinin vasitəçiliyi ilə Azərbaycan tərəfinə təhvil verilib.
Azərbaycanın və Ermənistanın dövlət qurumlarından və Beynəlxalq Qızıl Xaç Komitəsindən nümayəndələrin iştirakı ilə reallaşdırılan proses insidentsiz yekunlaşıb.
