Sabirabad sərəncamı
Sabirabad Sənaye Məhəlləsinin yaradılması haqqında prezident sərəncamı imzalanıb. Novator.az-ın məlumatına görə, noyabrın 27-də rəsmiləşən sənəd qeyri-neft sənaye sahələri üzrə məhsul istehsalı və xidmət müəssisələri yaradılmasını nəzərdə tutur. Məhəllənin fəaliyyətinin təşkili və tənzimlənməsi “Azərbaycan İnvestisiya Şirkəti” Açıq Səhmdar Cəmiyyətinə həvalə olunub.
Nazirlər Kabineti Sabirabad rayonu ərazisində 20,3 hektar torpaq sahəsinin məqsədli təyinatının dəyişdirilərək sənaye təyinatlı torpaqlar kateqoriyasına keçirilməsini iki ay müddətində təmin etməli, dörd ay ərzində torpaq sahəsini “Azərbaycan İnvestisiya Şirkəti” Açıq Səhmdar Cəmiyyətinin daimi istifadəsinə verməlidir.
İqtisadiyyat Nazirliyinə Sabirabad Sənaye Məhəlləsinin fəaliyyəti ilə bağlı torpaq sahəsinin istifadəyə yararlı vəziyyətə gətirilməsi, xarici və daxili infrastrukturun (elektrik və istilik enerjisi, qaz, su təchizatı, kanalizasiya, rabitə, nəqliyyat, yanğından mühafizə, istehsal təyinatlı, inzibati, sosial və digər infrastruktur obyektləri) qurulması, eləcə də məhəllənin işinin təşkili və tənzimlənməsi, o cümlədən iştirakçıların dəstəklənməsi və sahibkarlıq fəaliyyətinin səmərəli həyata keçirilməsi üçün digər xidmətlər göstərilməsi tapşırılıb.
Sabirabad Rayon İcra Hakimiyyəti torpaq sahəsinin məqsədli təyinatının dəyişdirilməsi ilə bağlı bir ay müddətində Nazirlər Kabineti qarşısında vəsatət qaldırmalıdır.
