Ağcabədidə açılışlar
Noyabrın 28-də Ağcabədi rayonuna səfər edən prezident İlham Əliyev Bayraq Muzeyinin açılışında iştirak edib. AZƏRTAC xəbər verir ki, muzeydə Azərbaycanda xanlıqlar dövrünün xəritəsi, orta əsrlərə aid döyüşçülərin geyimləri, müxtəlif dövrlərdə Azərbaycan ərazisində mövcud olmuş dövlətlərin bayraqları, XIX əsr Azərbaycan şəhərlərinin gerbləri, qədim metal sikkələr, kağız pullar, Azərbaycan Xalq Cümhuriyyəti dövrünə aid sənədlər, dövlət atributları, poçt markaları, orden və medallar nümayiş olunur.
Muzeyin ikimərtəbəli binasında akt və konfrans zalları, elektron kitabxana və digər inzibati otaqlar yaradılıb.
İlham Əliyev Ağcabədidə Tarix-Diyarşünaslıq Muzeyinin yenidənqurmadan sonra açılışına da qatılıb.
Heydər Əliyev Fondunun təşəbbüsü ilə Ağcabədidə inşa edilmiş 4 nömrəli körpələr evi-uşaq bağçasına da baş çəkən prezident sonra Ağcabədi Olimpiya İdman Kompleksini açıb. Prezident burada rayon ictimaiyyətinin nümayəndələri və ağcabədili idmançılarla görüşüb.
Həmin gün İlham Əliyev Müdafiə Nazirliyinin “N” saylı hərbi hissəsində yaradılan şəraitlə də tanış olub, rayonda yeni çörək və un məmulatları zavodunun açılışına qatılıb.
