Sərhəddə birgə əməliyyat
Azərbaycan və Rusiya daxili işlər nazirləri arasında əldə olunmuş razılaşma ilə sərhəd bölgəsində kompleks əməliyyat-axtarış və profilaktik tədbirlər keçirilib. Xəbəri Azərbaycanın Daxili İşlər Nazirliyi noyabrın 25-də yayıb.
Noyabrın 13-dən 19-dək keçirilən əməliyyatın əsas məqsədi sərhədyanı əməkdaşlıq məsələləri ilə bağlı qərarların yerinə yetirilməsi, transmilli mütəşəkkil cinayətkar dəstələrin zərərsizləşdirilməsi, silah-sursatın, partlayıcı maddələrin və qurğuların, narkotik vasitələrin, digər hüquqazidd əməllərin həyata keçirilməsinə yönələn hərəkətlərin qarşısının alınması olub.
Rusiyanın Dağıstan Respublikasının sərhədyanı bölgələrini və Azərbaycanın Qusar, Quba, Xaçmaz, Zaqatala, Şəki, Balakən, Qəbələ, Qax və Oğuz rayonlarını əhatə edən tədbirlər nəticəsində müxtəlif cinayətlər törətdiklərinə görə axtarışda olan 35 şəxs tutulub, o cümlədən Rusiyada axtarılan 14, Gürcüstanda axtarılan 1 nəfər, dövlətə borclu qismində axtarılan 66 nəfər saxlanıb, itkin düşmüş hesab edilən 2 nəfər tapılaraq ailələrinə təhvil verilib.
Əməliyyat-axtarış tədbirləri nəticəsində qanunsuz saxlanan 8 avtomat silahı, 6 tapança, 87 yivli və yivsiz tüfəng, 34 əl qumbarası, 30 ədəd silah sandıqçaları, 23 ədəd müxtəlif hərbi ləvazimat və sursat, 1 partlayıcı maddə, 1 qumbaraatan və 6120 müxtəlif çaplı patron götürülüb, narkotiklərlə əlaqədar 4 fakt aşkar olunub.
Tədbirlər zamanı Balakən rayonunda 8, Quba rayonunda 4, Qəbələ rayonunda 3, Xaçmaz rayonunda 2, Şəki rayonunda 1 fakt olmaqla qanunsuz odlu silah gəzdirmə, oğurluq və digər cinayətlərin açılması təmin edilib.
