Ermənistan-Avropa sazişinin əsas məqamları
Novator.az Ermənistanla Avropa İttifaqının hərtərəfli və geniş tərəfdaşlıq sazişinin əsas müddəalarına nəzər salıb. Saziş noyabrın 24-ü Brüsseldə imzalanıb.
Sənəddə qeyd olunur ki, Ermənistanla Avropa İttifaqının kiçik və orta müəssisələri biznes sahəsində informasiya və məsləhət mübadiləsi həyata keçirəcək, tənzimləmə mühitinin şəffaflığı üçün qarşılıqlı yardım göstərəcəklər.
Saziş ikitərəfli ticarətin və xidmət sahəsində (icarə, lizinq, maliyyə, poçt, nəqliyyat və s. sferalarda) əlaqələrin liberallaşdırılmasını nəzərdə tutur. Ermənistan şirkətləri Avropa İttifaqı məkanında, Avropa İttifaqı şirkətləri Ermənistanda xidmət təklif edə bilər. Ermənistan biznesi Avropa İttifaqı zonasında, Avropa İttifaqı biznesi Ermənistanda dövlət alışı müsabiqələrinə qatılmaq hüququ qazanır. Bəzi ictimai xidmət sferalarına da eyni şərt tətbiq olunur.
Ermənistanla Avropa İttifaqının 24 noyabr sazişi intellektual mülkiyyətin qarşılıqlı müdafiəsini də nəzərdə tutur.
Sazişə əsasən, dövlət alışları və tenderlərdə şəffaf prosedurlar təklif olunur.
Sənədə əsasən, Ermənistanın və Avropa İttifaqının təşkilatlarından ibarət müstəqil vətəndaş cəmiyyəti platforması yaradılır. Bu platforma Avropa İttifaqı ilə Ermənistanın imzaladığı sazişin yerinə yetirilməsi vəziyyətini nəzarətdə saxlayacaq, hər iki tərəfə tövsiyələr verəcək.
Saziş təhsil, ticarət, nüvə təhlükəsizliyi sahələrində, terrorçuluqla və mütəşəkkil cinayətkarlıqla mübarizə kimi məsələlərdə əməkdaşlığı da nəzərdə tutur.
