Çempionlar Liqası: qrupun yolu çətinləşir
2017-ci ildə Azərbaycan ilk dəfə UEFA Çempionlar Liqasının qrup mərhələsində təmsil olunur. “Çelsi”, “Roma”, “Atletiko” klubları ilə birgə C qrupunda yer alan Ağdamın “Qarabağ” komandası son tur ərəfəsində növbəti raunda çıxmaq imkanını itirib.
Novator.az bildirir ki, 2018-2019 mövsümündən Azərbaycanın Çempionlar Liqasının qrup raunduna düşməsi çətinləşir. UEFA-nın klub turnirlərinin yeni formatına əsasən, Çempionlar Liqasının qrupuna birbaşa çıxan komandaların sayı 22-dən 26-ya artırılır.
Məsələn, gələn il İspaniya, Almaniya, İngiltərə, İtaliya çempionatlarında 1-4-cü yerləri, Fransa, Rusiya çempionatlarında 1-2-ci yerləri tutan komandalar, Portuqaliya, Ukrayna, Belçika, Türkiyə çempionları, eləcə də Çempionlar Liqası və Avropa Liqasının son qalibləri qrup mərhələsinə birbaşa vəsiqə alacaq.
Qrupa digər 6 vəsiqənin taleyinə seçmə raundlarda aydınlıq gələcək. 4 vəsiqə çempionlar üçün nəzərdə tutulub. Bu istiqamətdə təsnifat mərhələlərinin sayı 4-dən 5-ə artıb. Cəbəllütariq, Andorra, San Marino və Kosovo çempionları mübarizəyə ilkin təsnifatdan (yarımfinal və final matçları) start verəcək.
Azərbaycan daxil olmaqla 33 UEFA üzvü turnirə birinci mərhələdən başlayır. Bundan sonra ikinci, üçüncü və dördüncü mərhələni keçib qrupa düşmək olar.
Çempion olmayan komandalar qrupadək üç ələmə mərhələsindən keçəcək. Onlara 2 vəsiqə ayrılıb (Təfərrüat).
