Avropa Liqası finişə yaxınlaşdı
UEFA Avropa Liqasının qrup mərhələsində sondan əvvəlki tur – beşinci tur başa çatıb. Novator.az-ın məlumatına görə, C qrupunda yarışan Türkiyə təmsilçisi “Başakşəhər” noyabrın 23-ü Bolqarıstanda “Ludoqorets”i 2:1 hesabı ilə məğlub edib. Bu, İstanbul klubunun ilk qələbəsi olub.
Portuqaliyanın “Braqa” komandası evdə Almaniyanın “Hoffenhaym” klubuna üstün gələrək (3:1) 1/16 finala adlayıb.
İ qrupunda yer alan digər Türkiyə klubu “Konyaspor” doğma meydanda “Marsel”lə (Fransa) xalları bölüb – 1:1.
Avstriyada Portuqaliyanın “Gimarayeş” klubunu 3:0 hesabı ilə yenən “Zalsburq” növbəti mərhələyə çıxıb.
İki dövrəlik turnirdən növbəti mərhələyə çıxış üçün qrupda ən azı ikinci yeri tutmaq gərəkdir. Hazırda həm “Başakşəhər”, həm də “Konyaspor” 5 xalla üçüncü pillədə qərarlaşıb.
23 noyabr oyunlarından sonra digər qruplardan “Vilyarreal” (İspaniya), “Partizan” (Serbiya), “Milan” (İtaliya), “Lion” (Fransa), “Atalanta” (İtaliya), “Viktoriya” (Çexiya), “Estersund” (İsveç), “Nitsa” (Fransa), “Real Sosyedad” (İspaniya) növbəti mərhələ problemini həll ediblər.
“Dinamo” (Ukrayna), “Styaua” (Rumıniya), “Arsenal” (İngiltərə), “Latsio” (İtaliya) və “Zenit” (Rusiya) növbəti raunda vəsiqəni daha əvvəl almışdılar.
